Gartneriet
Sogn Jord- og Hagebruksskule driv økologisk veksthusproduksjon i to veksthus: eitt klimaregulert veksthus med tre avdelingar (810 m2) og eitt plasthus (600 m2) med dobbel vegg. Her dyrkar me økologiske tomatar, agurk, salat, chilli, paprika, urter og eit stort utval av sommar blomar.
Veksthusa vert også brukte til oppal av småplanter for grønsakdyrkinga ved skulen. I tillegg har me planteskule for staudar og frukttre. Grønsaker, planter og blomar frå veksthusa er til sals i gardsbutikken.
Økologisk veksthusproduksjon har same grunnprinsipp som det økologiske landbruket elles. Her blir det brukt organisk gjødsel på plantene. Me brukar biologiske metodar mot skadedyr og plantesjukdomar, t.d. nyttedyr som snylteveps, rovmidd og nematodar.
Produksjonar
Me har eit assortert utval av potteurte, til dømes basilikum, timian, oregano og salvie. Tomat, agurk, salat, chilli og paprika vert dyrka i plasthuset. Haustinga av tomat startar rundt jonsok og varer til ut september. Agurk, chilli og paprika kjem litt seinare. Av sommarblomar har me eit rikt utval, både til pryd og nytte.
Veksthusa har planteoppalet for grønsaker til skulen sin grønsaksproduksjon; purre, selleri, kålplanter, urter og veksthuskulturar. Elevane lærer å laga jordblandingar og er med på prikling og stell av småplantene i veksthuset.
